• The page is not available in English. Go to English homepage

    • Fugleinfluensa og newcastlesjuke – no er smittevern viktig

    Det er viktig at du som har fjørfe, har godt smittevern og at du har låg terskel for å melde frå til Mattilsynet ved mistanke om sjukdom.

    Fagleg gjennomgått

    Du som har fjørfe, er smittevern­sjef i anlegget ditt. Den aller viktigaste jobben du kan gjere for å hindre smitte i flokken din, er å tenke føre­bygging i alt du gjer. Dei fleste sjukdommar smittar før sjukdoms­teikn opptrer, så tenk på det kvar gong du går inn og ut av fjøset ditt.

    Dersom du driv eit kommersielt dyre­hald, er du forplikta til å ha ein skriftleg smittevern­plan: Smittevernplan for alle næringsretta dyrehald. Smittevern­planen skal oppdaterast minst ein gong i året, kanskje det er på tide å sjå på han no?

    Du er også forplikta til å ha ei smitte­sluse: Smittesluse i anlegg med næringsrettet dyrehold. Hugs at alle som går inn i dyre­haldet ditt, må bruke denne. Tenk også nøye over kven du slepp inn til dyra dine. Mattilsynet anbefaler at du held talet på besøkande på eit absolutt minimum.

    Går du på jakt og driv med fjørfe? Da kan du dra smitte frå ville fuglar inn til dyra dine. Mattilsynet anbefaler at folk som handterer ville fuglar, ikkje går inn i dyre­hald med fjørfe.

    Hugs at eventuell smitte i dyre­haldet ditt ikkje berre vil få konsekvensar for deg og dyra dine, men for alle som har dyrehald med fjørfe i ein omkrets på 10 km rundt dyre­haldet ditt.

    Meld frå til Mattilsynet ved mistanke om smitte

    Viss du har mistanke om fugle­influensa eller newcastle­sjuke, må du straks melde frå til Mattilsynet på telefon 22 40 00 00.

    Dei vanlegaste symptoma på fugleinfluensa:

    • auka dødelegheit
    • nedsett fôr- og vassinntak
    • nedsett eggproduksjon
    • kliniske teikn på sjukdom

    OBS: Det er gjort funn av fugleinfluensa i andre land der fuglane ikkje har vist teikn på sjukdom. Dette gjeld særleg for slakte­kylling. Det er derfor viktig at ein er spesielt merksam på endringar i fôr­inntaket. Av og til er redusert fôrinntak den einaste indikatoren på at smitten har komme inn i flokken.

    Ver klar over at ulike fugleartar viser varierande grad av kliniske symptom på fugleinfluensa. I dyrehald med kalkun og høns kan det vere mange plutselege døds­fall utan tidlegare symptom, mens ender og gjæser i mindre grad viser kliniske teikn på sjukdom.

    Symptom på newcastlesjuke:

    • nedgang i verpeprosent
    • forandringar i eggeskal og auka førekomst av skinn­egg (egg utan skal)
    • nedsett fôr- og vassopptak
    • fuglar som døyr plutseleg
    • fuglar som veks dårlegare enn forventa
    • fuglar med diaré
    • fuglar med symptom frå luft­vegane (snue, hoste)
    • generell endring av åtferd i flokken

    Symptoma på newcastle­sjuke varierer sterkt avhengig av kva virus­stamme dyra er smitta med.

    Vidare vil sjukdommen arte seg ulikt avhengig av art, alder og immun­status hos fuglar som blir ramma.

    Newcastlesjuke kan variere frå akutt forløp med høg dødelegheit til eit sjukdomsforløp med få eller ingen symptom.

    I dei seinaste utbrota av newcastle­sjuke har det ikkje vore symptom på sjukdom hos fuglane, men hos verpe­høns har det vore eit kraftig dropp i egg­produksjonen, nedgang i fôr­opptak og forhøgd tal på egg utan skal og egg med forandringar i eggeskal­kvalitet.

    Ved mistanke, kontakt det lokale Mattilsynet på telefon 22 40 00 00.