Solkrem

Solkremar inneheld anten fysiske (mineralske) eller kjemiske filter, eller ein kombinasjon av begge typar filter. Filtra beskyttar huda mot skadeleg UV-stråling.

Godkjente og trygge i bruk 

Alle UV-filter som er tillatne til bruk i EU/EØS, inkludert i Noreg, har gjennomgått ei grundig risikovurdering og har fastsette grenseverdiar. Godkjende UV-filter er oppførte på vedlegg VI i kosmetikkforordninga (EF) nr. 1223/2009. I dette vedlegget er det spesifisert kva for UV-filter som er tillatne, i kva for konsentrasjonar og eventuelle bruksvilkår eller avgrensingar. 

Alle UV-filter i dette vedlegget er vurderte som trygge av Den vitskaplege komiteen for forbrukartryggleik i EU, kalla SCCS (Scientific Committee on Consumer Safety). SCCS gjev uttale om helse- og tryggleiksrisikoar ved produkt til forbrukar som ikkje er mat i EU. Komiteen er uavhengig og består av ekspertar frå ulike medlemsland. Når det gjeld kosmetikk, vurderer SCCS tryggleiken til ingrediensane. 

Det betyr at mengdene som er tillatne i solkrem, er fleire gonger lågare enn nivå som kan vere helseskadelege. Risikoen for helseskade frå UV-stråling ved å ikkje bruke solkrem er langt større enn eventuell risiko for hormonforstyrrande effektar frå godkjende UV-filter. 

Du finn meir informasjon i risikovurderingar frå Vitskapskomiteen for mat og miljø (VKM): 

Risikovurdering - UV-stråling og bruk av solkrem (vkm.no)
Nytte- og risikovurdering av solkrembruk (vkm.no)

Fysiske filter 

Eksempel på fysiske filter er titandioksid og sinkoksid. Desse legg seg som eit lag utanpå huda og reflekterer UV-strålane bort. Dei verkar med ein gong etter påføring, og er ofte anbefalt for sensitiv hud eller små barn. Dei kan gi ei kvit hinne på huda. 

Kjemiske filter 

Eksempel på kjemiske filter er stoff som avobenzon, oktokrylen og oxybenzon, som absorberer UV-strålane og omdannar dei til varme. Det tek ofte 15–30 minutt før desse gir full effekt etter påføring. Kjemiske filter er vanlege i mange solkremar fordi dei er lette å smørje ut og ikkje etterlet ei kvit hinne. 

Kva bør du velje? 

Valet mellom fysiske og kjemiske filter avheng av hudtype, preferansar og behov for solvern. Enkelte produkt kombinerer begge for å gi eit breispektra vern mot både UVA- og UVB-stråling. 

Uansett kva type filter du vel, er det viktigaste at du bruker solkrem regelmessig og i rett mengde. Alle godkjende UV-filter i solkrem på den norske marknaden er trygge å bruke, og bidreg til å beskytte mot solskadar og enkelte typar hudkreft. 

Mange kosmetiske produkt inneheld i dag solfilter, men det er stor forskjell på solkrem og andre produkt som berre inneheld SPF som ein tilleggsfunksjon. Her forklarer vi kvifor det er viktig å bruke solkrem når du skal vere ute i sola. 

Kosmetikk med SPF 

Fleire kosmetiske produkt, som hudkremer og sminke, er i dag tilsett solfilter for å gi ekstra vern i kvardagen. Dette er likevel ikkje ei god nok erstatning for bruk av solkrem. 

Desse produkta har ikkje solbeskyttelse som hovudfunksjon. Hovudfunksjonen deira kan til dømes vere å tilføre fukt (hudkrem) eller å ha ei viss dekkevne (foundation). Slike produkt blir ofte brukte i mindre mengder enn solkrem, og berre smurte på om morgonen eller éin gong om dagen. Difor kan vernet i praksis bli lågare enn det oppgitte SPF-talet på produktet. Det blir heller ikkje stilt krav om vern mot UVA-stråling, minimum SPF, kritisk bølgelengde eller nødvendig informasjon til forbrukarane i slike produkt. 

Sjølv om ein dagkrem eller sminke har SPF, bør du likevel bruke solkrem når du skal opphalde deg ute i sola over tid.