Gazirdanniibbiin njuovvat bohccuid árbevirolaš vuogi mielde
Gazirdanniibi lea adnon sámi boazoealáhusas juo guhká. Dat lea elliidčálggu mielde dohkálaš ja lobálaš vuohki jámihit bohcco. Biebmobearráigeahčču Beaivválašgielas dadjat ahte goddit bohcco gazirdanniibbiin. Njuolggadusmearrádusat earuhit iešguđet lágan vugiid movt jámihit ja goddit bohcco. Gazirdanniibbi atnu definerejuvvo leat vuohki mainna jámiha ealli. Heakkahuhttit dáhpáhuvvá go eallis luoitá vara.
Ferte ealli jámihit riekta vai garvá ahte ealli gillá dárbbašmeahttumiid – lea álki dahkat boastut. Danne lea mearriduvvon ahte son guhte áigu jámihit ealli gazirdanniibbiin ferte sáhttit duođaštit ahte máhttá dan dahkat dohkálaččat. Lea maid mearriduvvon ahte oahpahusa galgá Biebmobearráigeahčču dohkkehan.
Maid dadjá njuolggadusmearrádus?
Njuolggadusmearrádus, mii gusto EO ja maiddái Norgii, lea mearriduvvon makkár vuogit leat dohkkehuvvon go galgá jámihit ja heakkahuhttit ealli. Dán njuolggadusmearrádusas ii leat gazirdanniibi dohkkehuvvon vuohki mainna jámiha ja heakka-huhttá ealli. Norga lea goitge ožžon dohkkehuvvot našuvnnalaš láhkaásahusa; “Láhkaásahus gazirdanniibbi geavaheami birra”, man mielde lea lobálaš gazirdanniibbi atnit jámihanvuohkin sámi boazoealáhusas, ja nu lea vejolaš árbevirolaš vuogi mielde njuovvat bohccuid.
Láhkaásahusas čilgejuvvojit dat mávssoleamos eavttut movt gazirdanniibi galgá adnot vai sihkkarastá ahte boazu ii gillá dárbbašmeahttun riehkkama, bákčasa ja gillámuša;
- Sii guđet galget gazirdanniibbi atnit fertejit čađahan dohkkehuvvon kurssa
- Gazirdanniibi lea dohkkehuvvon adnot go heakkahuhttá bohcco sámi boazoealáhusas, muhto ii njuovahagas
- Gazirdanniibi galgá riekta hábmejuvvon, vai dat lea doarvái beaktil go adno heakkahuhttimii
- Ealli mii lea jámihuvvon gazirdan-niibbiin, das galgá álo varra luitot dakkaviđe maŋŋil
- Oahpahus, man vuođul galgá leat lohpi atnigoahtit gazirdanniibbi, huksejuvvo dáid eavttuid vuođul.
Dárkkista go Biebmobearráigeahčču jus mus lea gelbbolašvuođaduođaštus atnit gazirdanniibbi?
Juo, gazirdanniibeláhkaásahus lea okta dain láhkaásahusain masa Biebmobearráigeahčus lea ovddasvástádus gozihit ahte boazoealáhusas čuvvot. Lea hui dárbbašlaš ahte son guhte niskkáda vuhtiiváldá buori elliidčálggu, ja danne gáibidit mii ahte lea oahppu ja gelbbolašvuođaduođaštus.
Ealli jámiheapmi ja heakkahuhttin, mii dagaha ahte ealli gillá dárbbašmeahttumiid, čuovvuluvvo dan ektui man duođalažžan mii árvvoštallat ášši.
Gos sáhtán oasálastit kursii?
Sámi joatkka- ja boazodoalloskuvla Guovdageainnus galgá doallat čakčat kurssa movt atnit
gazirdanniibbi. Boazodoallosuorggi oahppit ja earát boazoealáhusas sáhttet searvat kursii. Skuvla pláne lágidit kurssa sihke Guovdageainnus ja eará báikkiin dárbbu mielde. Go leat čađahankurssa, de oaččut gelbbolašvuođaduođaštusa beassat atnit gazirdanniibbi bohcco jámiheapmái. Eambbo dieđuid oaččut go válddát oktavuođa skuvllain: tlf. 78 48 45 00 / post@samisk.vgs.no
Leat go dus gažaldagat?
Váldde oktavuođa iežat báikkálaš Biebmobearráigeahčuin tlf. 22 40 00 00
Regulations
Forskrift om bruk av krumkniv
Source: Lovdata.no