Spørsmål og svar om krav til treemballasje
Informasjon om krava som gjeld merking, behandling, import og eksport.
Kva slags treemballasje er omfatta av krava til behandling og merking?
Krava omfattar alle typar treemballasje, for eksempel kasser, pallar, pallekarmar og tromlar. Støttemateriale (dunnasje) og mellomlegg (strø) av trevirke som blir nytta til å kile fast eller støtte last, er også omfatta av krava.
Kva typar treemballasje er haldne unna krava om merking og behandling?
Treemballasje som berre består av prosesserte treprodukt framstilte ved hjelp av lim, varme eller trykk, eller ein kombinasjon av dette, blir ikkje omfatta av krava. Dette gjeld for eksempel finer, kryssfiner, sponplater og OSB-plater. Trespon og anna tre med tjukkleik på maks. 6 mm er heller ikkje omfatta av krava.
Når gjeld krava til merking og behandling av treemballasje?
Krava gjeld alltid når treemballasje er i bruk ved import eller eksport av alle typar varer. Ved import eller eksport av treemballasje som vare er det ulike føresegner frå land til land avhengig av om det er ny eller brukt treemballasje, treslag og opphav.
Gjeld krava til treemballasje også ved eksport og import av varer mellom Noreg og EU/EØS-land?
Ja, krava gjeld ved import og eksport mellom Noreg og EU-landa.