Status for antibiotikaresistens i Noreg
Noreg har lite antibiotikaresistens samanlikna med mange andre land.
Likevel blir situasjonen påverka av kor mykje antibiotika som blir nytta til dyr og menneske, både i Noreg og i utlandet. Smittespreiing av resistente bakteriar heng også saman med helse, hygiene, biosikkerheit, befolkningstettleik, reiseaktivitet og handel med dyr.
Fleire sjukdomsutbrot og økonomiske kostnader
Resistente bakteriar kan føre til sjukdomsutbrot som aukar behandlingskostnader, gir fleire tapte arbeidsdagar og redusert produktivitet. I tillegg kan matindustrien lide økonomisk når tiltak må settast inn for å handtere og førebygge utbrot.
Risiko for matproduksjon og forsyning
Viss sjukdommar spreier seg ukontrollert blant produksjonsdyr på grunn av resistens, kan det redusere matproduksjonen og true matsikkerheita.
Trussel mot berekraftig matproduksjon
Overforbruk av antibiotika i landbruket eller til oppdrettsfisk kan føre til ein vond sirkel der stadig sterkare antibiotika må brukast. Dette er verken berekraftig eller effektivt, og det aukar risikoen for at resistente bakteriar blir spreidde til jord og vatn.