Dokumentasjon av legemiddelbruk på matproduserande dyr
Driftsansvarlege og andre som behandlar matproduserande dyr med legemiddel, må dokumentere legemiddelbruken.
I tillegg til krava om dyrehaldjournal og journal over helseopplysingar i dyrehelseregelverket er det i legemiddelforordninga krav om at driftsansvarleg som gir legemiddel til matproduserande dyr, skal dokumentere dette. Dokumentasjon på legemiddelbruk blir rekna som ein del av helseopplysingane i dyrehaldet.
Du som er driftsansvarleg og behandlar matproduserande dyr, må skriftleg dokumentere følgande om legemiddelbruk:
- dato for første gong dyr får legemiddelet
- namn på legemiddel
- mengde legemiddel dyret har fått
- namn på apoteket eller grossisten der du fekk utlevert legemiddel eller medisinfôr
- resept på legemiddelet
- kva dyr eller kva gruppe av dyr som har fått legemiddelet
- namn og kontaktopplysingar til veterinær som har skrive ut resepten
- tilbakehaldstida, sjølv om den er 0
- kor mange dagar du har behandla dyret med legemiddelet
Kopi av resepten på legemiddelet skal også oppbevarast.
Unntak ved behandling av enkeltdyr
Dersom alle opplysingar lista opp ovanfor kjem fram av resept frå veterinær, og du som driftsansvarleg oppbevarer resepten, blir dokumentasjonsplikta rekna for deg som driftsansvarleg som oppfylt.
Unntak ved behandling av hest
Dersom alle opplysingar lista opp ovanfor blir dokumenterte i hestepasset, blir dokumentasjonsplikta rekna for deg som driftsansvarleg for hesten som oppfylt.
Dokumentasjonen skal oppbevarast i fem år og leggast fram for Mattilsynet dersom vi ber om den.